SAFO – BERTAN BEHERA UTZITA

SAFO IKUSKIZUNAREN EMANALDIA BERTAN BEHERA

Bilbo, 2022ko abenduak 5.- Arriaga Antzokiak jakinarazten du, arrazoi teknikoak eta logistikoak direla eta, abenduaren 10erako aurreikusita zegoen Safo antzezlanaren emanaldia bertan behera geratu dela. Arriaga Antzokiak bere atsekabea adierazten du baliogabetzeak eragin ditzakeen eragozpenengatik, eta jakinarazten du dirua itzuliko diela antzezlanerako sarrerak erosi dituzten guztiei, erosketarako erabili zen kanal berbera erabiliz. Informazio gehiago antzokiko Informazio Bulegoan eta txarteldegietan.

Espainiako eszena garaikidean erreferentziazkoak diren hiru emakume sortzailek poema musikal, bisual eta eszenikoa taularatuko dute, antzerkiaz haragoko jolas bat, eta, iraganaren eta orainaldiaren artean, antzinate klasikoko emakume olerkari haren figura hurbilduko digute. Marta Pazos da proposamenaren zuzendaria; Christina Rosenvingek konposatu ditu musika-piezak, zuzenean interpretatzen direnak, eta María Folguera arduratu da testuez, Saforen poemetan oinarrituta.

Ekialdearen eta Mendebaldearen artean dagoen Lesbos uharteko lorategi batean, Safo olerkariak artearen babesle diren Musak deitu ditu, etorkizunean bere izenarekin zer gertatuko den jakiteko. Jainkosek jolasteari utzi eta denboran zeharreko bidaian eramango dute Safo: Ovidioren garaitik XXI. mendera, galdutako bertsoetatik Christie’s-en egiten ari diren enkante batera. Baina Safo gizatiarrarengana ere hurbilduko gara, ezteietan emanaldiak eskaintzen zituen harengana, beste emakume batzuekiko desira abestu zuenarengana. Safok asmatu zuen maitasuna ulertzeko dugun modua. Gaur gauean, Musen eskutik, emakume olerkari hura ulertzen saiatuko gara.

Poema eszeniko, musikal eta bisuala da Safo, eta Lesboseko poeta handiaren figura aztertzen du. Egile enigmatiko eta misteriotsua da, eta gaur egunera arte ohoratu eta goraipatu dute. Hamar mila bertso baino gehiago idatzi bazituen ere, gutxi dira oso-osorik iritsi zaizkigun poemak;, bertso solteak iritsi zaizkigu batez ere. Haren lanaren absentzia oso nabarmena izan arren, haren legendazko figura handituz joan da etengabe.