Historia de un jabalí o Algo de Ricardo

Joan Carreras aktore onenaren MAX Saria jaso zuen lan honetan egindako interpretazioagatik.

Aktore batek William Shakespeareren tragediako errege gupidagabe Rikardo III.a antzezteko erronkari egin beharko dio aurre. Bizitza osoa darama bigarren mailako paperak egiten, eta aukera hori merezi duela uste du. Hala ere, iruditzen zaio taldeko gainerako aktoreak ez daudela bere mailan eta ez zaio batere gustatzen zuzendariak proposatzen diona. Pertsonaia eraikitzen ari den bitartean, aktorearen eta errege ingelesaren arteko antzekotasunak azaleratzen hasiko dira. Biak ala biak handizaleak eta argiak dira. Rikardo III.a bezalaxe, Juan ez da gutxirekin konformatzen, botere-irrika du eta ez dago denbora galtzeko prest aktore ahul, oso sentibera edo erdipurdikoekin. Bien bizitzako istorioak elkarren artean lotzen joan ahala, aktorearen, pertsonaiaren eta ikuslearen arteko harremana gero eta estuago bihurtuko da.

Historia de un jabalí o Algo de Ricardo antzezlanak gaur egungo botere-mekanismoez, desioaz eta erresuminaz hitz egiten du, eta gizakien anbizioaren mugei buruzko hausnarketa proposatzen du.