GORKA URBIZU

Kontzertu honetarako sarrerak abenduaren 18an egongo dira salgai.

Gorka Urbizuk bere izenez sinatzen duen lehen diskoa da Hasiera bat. Hamar kantuk osatzen dute bilduma. Hamar aukera. Hamar erabaki. Izan zitezkeen beste batzuk, baina hauexek dira: Maitasun bat, Teoria bat, Tren bat, Toki bat, Janela bat, Kolore bat, Lilura bat, Etxe bat, Sute bat, Besterik ez.

Egungo gure bizitzeko modu frenetikoaren ifrentzua da Gorka Urbizuren Hasiera bat lana, hitzaren eta kantuaren sortze lanak eskatzen duten patxadaz ondua. Barnera biltzeko gonbite bat eta deslilurarentzako lekurik ez dagoen toki sekretu bat. Munduaren basakeriaren aurrean edertasun dosi bat eskaintzeko ahalegin gordin bat. Jordi Matasek ekoitzia, bere biluzian erpin ugari erakusten duen diskoa da hau. Maitasunez eta maitasunaz egina. Ez alde egin denbora baino lehen. Helduko da. Heldu da. Eta hau, hasiera bat baino ez da.

“Gauzak ez dira horrela / Gauzak horrelaxe daude /Eta sinesmen horretan /Ardazten da gure mundua” aitorpenak bidea erakusten du. Aldaketaren aldeko aldarria. Kantu hauek horrelaxe daude: “harkaitza bezain gogor, haizeak astindutako hostoa bezain hauskor”. Beste nonbaitetik sortzeko apustua egin du Berri Txarrakeko abeslari ohiak: soildu eta soildu, muina ukitu arte: Hezurra. Egia. Egia bat.